रौतहट,२४ असार ।
रौतहटको परोहा नगरपालिका–७ नरकटियामा आज बिहान एक दुखद मोटरसाइकल दुर्घटनामा परी एक युवकको ज्यान गएको छ।
जिल्ला प्रहरी कार्यालय गौरका अनुसार २० वर्षीय करण पासवानको मोटरसाइकल दुर्घटना हुँदा घटनास्थलमै मृत्यु भएको हो। उनी नरकटियाका स्थानीय रामेश्वर दुसाधका छोरा हुन्।
पासवान बा ५२ प ७५०९ नम्बरको मोटरसाइकल लिएर नरकटियाबाट बन्कुलतर्फ जाँदै गरेका थिए। सोही क्रममा सन्तुलन गुमाई मोटरसाइकल सडकबाट तल खस्दै रुखमा ठोक्किएको प्रहरीले जनाएको छ।
गम्भीर घाइते भएका पासवानको घटनास्थलमै ज्यान गएको हो। उनको शव पोस्टमार्टमका लागि प्रादेशिक अस्पताल गौरमा पठाइएको छ।
जिल्ला प्रहरी कार्यालय गौरका प्रहरी निरीक्षक रामकुमार महतोका अनुसार दुर्घटनाबारे थप अनुसन्धान भइरहेको छ।
