रौतहट,०५ असार । रौतहट जिल्लाको पश्चिमी क्षेत्रमा पर्ने बौधिमाई नगरपालिकाका नगर प्रमुख प्रदीप यादवले श्री प्राथमिक विद्यालय, बंकुलका लागि चार कोठे विद्यालय भवनको शिलान्यास गरेका छन्।
शिलान्यास कार्यक्रम आज वडा नं. ७ बंकुलमा सम्पन्न भएको हो। नगर प्रमुख यादवले बालबालिकालाई गुणस्तरीय शिक्षाको पहुँच सुनिश्चित गर्नका लागि नयाँ भवन आवश्यक रहेको भन्दै भवन निर्माण कार्यको सुरुवात गरिएको बताए।
राजनीतिक रूपमा सक्रिय हुँदा देखिनै शिक्षा क्षेत्रलाई प्राथमिकतामा राख्दै आएका युवा नगर प्रमुख यादवले निर्माण कार्य समयमै सम्पन्न गर्न ठेकेदार कम्पनीलाई निर्देशन समेत दिएका छन्।
कार्यक्रममा बौधिमाई नगरपालिकाका प्रमुख प्रशासकीय अधिकृत उदय शंकर चौधरी, वडा नं. ७ का वडा अध्यक्ष नरेन्द्र कुमार सिन्हा, विद्यालयका प्रतिनिधिहरू तथा स्थानीयवासीको उपस्थिति रहेको थियो।
