गौर, २९ बैशाख ।
हिन्दू धर्म तथा समुदायप्रति आपत्तिजनक भाषा र अश्लील गाली गलौज गर्दै सामाजिक सञ्जालमा भिडियो पोस्ट गर्ने एक युवकलाई प्रहरीले पक्राउ गरेको छ।
प्रहरीका अनुसार पक्राउ परेका युवकले फेसबुक र टिकटकजस्ता सामाजिक सञ्जालमार्फत हिन्दू धर्म र त्यसका आस्थामाथि खुलेआम आपत्तिजनक तथा घृणास्पद टिप्पणी गर्दै आएका थिए। ती युवकले प्रयोग गरेका शब्दहरू धार्मिक सहिष्णुतामाथि प्रश्न उठाउने खालका थिए भने समाजमा द्वेष फैलाउने आशंकाले प्रहरीले उनलाई नियन्त्रणमा लिएको हो।
रौतहटको सदरमुकाम गौरबाट पक्राउ परेका ती युवकको नाम प्रहरीले प्रारम्भिक अनुसन्धानपछि सार्वजनिक गर्ने बताइएको छ। जिल्ला प्रहरी कार्यालय रौतहटका प्रमुखले बताएअनुसार, साइबर अपराधसम्बन्धी ऐनअनुसार उनीमाथि कारबाही प्रक्रिया अघि बढाइएको छ।
प्रहरीले सबै नागरिकलाई सामाजिक सञ्जालको प्रयोग गर्दा जिम्मेवार हुन आग्रह गर्दै, धार्मिक आस्था र सामाजिक सद्भावमा आँच आउने खालका क्रियाकलाप नगर्न चेतावनी दिएको छ।
