रौतहट २९ बैशाख ।
रौतहट जिल्लाको माधव नारायण नगरपालिकामा विकास र सुशासनको गति तिव्र हुँदै गएको छ। नगर प्रमुख बैजनाथ यादव र प्रमुख प्रशासकीय अधिकृत नगेन्द्र यादवको समन्वय र सक्रिय नेतृत्वमा नगरपालिकाले विभिन्न क्षेत्रमा उल्लेखनीय उपलब्धिहरू हासिल गर्दै आएको छ।
पछिल्लो समयमा सडक विस्तार, खानेपानी योजना, शिक्षा तथा स्वास्थ्य सेवामा गुणात्मक सुधार ल्याउने अभियान तीव्र रुपमा अगाडि बढाइएको छ। नगर प्रमुख बैजनाथ यादवले स्थायी र समावेशी विकासलाई प्राथमिकता दिँदै जनताको आवश्यकता अनुसार नीति तथा कार्यक्रमहरू कार्यान्वयनमा ल्याएका छन्। प्रमुख प्रशासकीय अधिकृत नगेन्द्र यादवको प्रशासनिक दक्षता र पारदर्शिता सुनिश्चित गर्ने शैलीले नगरवासीको विश्वास अझ बढाएको छ।
“हामी विकासमा राजनीति होइन, परिणाममुखी काम चाहन्छौं,” नगर प्रमुख यादवले बताए। उता प्रशासकीय अधिकृत यादवले भने, “नगरपालिकाको सेवा पारदर्शी र प्रभावकारी बनाउन हामी प्रतिवद्ध छौं।”
स्थानीयवासीहरू पनि नगरपालिकाको कामप्रति सन्तुष्ट देखिन्छन्। “पहिले भन्दा अहिले सडक, शिक्षा र सरसफाइमा धेरै सुधार देखिएको छ,” एक स्थानीय बासिन्दाले बताए।
यस्ता साझा प्रयासहरूले माधव नारायण नगरपालिकालाई समृद्ध र नमुना नगरपालिका बनाउने दिशामा अग्रसर बनाइरहेको छ।
