रौतहट २९ बैशाख ।
रौतहटको माधवनारायण नगरपालिकाका नगर प्रमुख बैजनाथ प्रसाद यादवले वडा नं. ८ पिप्राको रजवडामा नवनिर्मित वडा कार्यालय भवनको रूपमा उद्घाटन गरेका छन्।
करीब ६१ लाख रुपैयाँको लागतमा निर्माण सम्पन्न भएको सो भवन ६ कोठे सुविधा सम्पन्न संरचना हो। स्थानीय सेवाप्रवाहलाई प्रभावकारी बनाउने उद्देश्यले निर्माण गरिएको यस भवनले वडा कार्यालयको सेवा लिन सहज हुने अपेक्षा गरिएको छ।
उद्घाटन कार्यक्रममा प्रमुख प्रशासकीय अधिकृत नागेन्द्र राय यादव, बाराको महागढीमाई नगरपालिकाका प्रमुख प्रशासकीय अधिकृत लक्ष्मण साह, वडा नं. ८ का वडा अध्यक्ष योगेन्द्र प्रसाद कुशवाहा, वडा नं. ९ का अध्यक्ष राम नरेश रायसहित अन्य स्थानीय जनप्रतिनिधि, कर्मचारी तथा सर्वसाधारणको उल्लेखनीय उपस्थिति रहेको थियो।
नगर प्रमुख यादवले कार्यक्रममा बोल्दै भने, “नगरपालिकाको नेतृत्व सम्हालेदेखि नै गाउँ-गाउँमा विकास निर्माण कार्यलाई प्राथमिकतामा राखेर अघि बढ्दै आएका छौं। यो वडा कार्यालय भवन पनि जनताको सेवा पहुँचमा पुर्याउने हाम्रो अभियानको एउटा उदाहरण हो।”
उनले थपे,माधवनारायण नगरपालिकाको प्रत्येक वडामा आधारभूत पूर्वाधार निर्माण, सडक, शिक्षा, स्वास्थ्य र खानेपानी लगायतका क्षेत्रमा निरन्तर सुधार ल्याउने लक्ष्यका साथ काम गरिरहेका छौं।”
स्थानीय बासिन्दाले नव निर्मित भवनको स्वागत गर्दै सेवासुविधा घरआँगनमै उपलब्ध हुने विश्वास व्यक्त गरेका छन्।
नगरपालिकाले आगामी दिनमा अन्य वडाहरूमा पनि यस्तै पूर्वाधार निर्माण कार्यलाई तीव्रता दिने जनाएको छ।
