रौतहट , २९ बैशाख ।
रौतहटको गरुडा नगरपालिका उपमेयर पुनम चौधरीद्वारा आफ्ना स्वर्गीय श्रीमान् मनोज चौधरीको ४औं पुण्यतिथिको अवसरमा समाजसेवा गर्दै बंशीराम अनाथालयमा खाद्यान्न सामग्री सहयोग गरिएको छ।
उपमेयर चौधरीले स्व. मनोज चौधरीको सम्झनामा गरिब, असहाय तथा टुहुरा बालबालिकालाई सहयोग गर्ने उद्देश्यले अनाथालयमा चामल, दाल, तेल, नुन, नास्ता सामग्री लगायतका अत्यावश्यक खाद्यान्न वितरण गरेकी हुन्।
सो कार्यक्रममा बोल्दै उपमेयर चौधरीले स्व. श्रीमानको समाजसेवाप्रतिको लगाव र सद्भावलाई निरन्तरता दिने उद्देश्यले हरेक वर्ष पुण्यतिथिमा सामाजिक कार्यमा संलग्न हुने बताइन्। “सामाजिक उत्तरदायित्व निर्वाह गर्नु सबैको कर्तव्य हो,” उनले भनिन्, “र स्व. मनोजजीको सम्झनामा यस किसिमका सहयोग कार्यहरूलाई निरन्तरता दिइनेछ।”
बंशीराम अनाथालयका सञ्चालक तथा बालबालिकाले उपमेयर चौधरीप्रति आभार व्यक्त गर्दै सहयोगले दैनिक जीवनमा राहत मिल्ने बताएका छन्।
