रौतहट,०१ जेठ ।
रौतहटको परोहा नगरपालिकामा चालु विकास योजनाको प्रगति अनुगमन गरिएको छ। नगर प्रमुख शेख वकिल, इन्जिनियर दिपेन्द्र यादव, वडा अध्यक्ष सजिम अन्सारीसहित विभिन्न वडाका जनप्रतिनिधि र स्थानीय बासिन्दाहरूको उपस्थितिमा योजनाहरूको स्थलगत निरीक्षण गरिएको हो।
अनुगमन टोलीले नगरभित्रका विभिन्न निर्माणाधीन योजनाहरूको अवस्थाबारे जानकारी लिँदै आवश्यक निर्देशनसमेत दिएको थियो। नगर प्रमुख शेख वकिलले विकास कार्यमा गुणस्तर र समयसीमा दुवैलाई प्राथमिकता दिनुपर्नेमा जोड दिएका थिए।
इन्जिनियर दिपेन्द्र यादवले योजनाहरूको प्राविधिक पक्षबारे जानकारी गराउँदै, कतिपय योजनामा थप निगरानी आवश्यक रहेको बताए। वडा अध्यक्ष अन्सारीले स्थानिय जनताको अपेक्षाअनुसार काम अघि बढिरहेको जानकारी दिए।
स्थानीयले पनि अनुगमन टोलीलाई विभिन्न सुझाव तथा गुनासा राखेका थिए। नगरपालिकाले नियमित अनुगमनमार्फत योजनाहरूको कार्यान्वयनमा पारदर्शिता र प्रभावकारिता ल्याउने प्रतिबद्धता जनाएको छ।
