बारा ०५ जेठ । बाराको उत्कृष्ट नगरपालिका मानिएको पचरौता नगरपालिका–७ बेनौलीमा लामो समयदेखि विकासमा अवरोध बनिरहेको एक विवादित घर अन्ततः भत्काइएको छ। यससँगै बेनौलीमा रोकिएको विकास पुनः तीव्र गतिमा अघि बढेको छ।
नगरप्रमुख जलन्धर सिंहले श्री गढीमाई राष्ट्रिय दैनिकसँगको कुराकानीमा बताएअनुसार, बेनौली गाउँ पालिकाको राजधानीसरह रहेको स्थान भएकाले त्यहाँ सम्पूर्ण पूर्वाधार सुविधाहरू विस्तार गर्न नगरपालिकाले विशेष प्राथमिकता दिएको छ। उनले भने, “विकास रोक्न खोज्नेहरू असफल भएका छन्, कानुनअनुसार सबै प्रक्रिया पुरा गरेर विकास अघि बढाइएको हो।”
नगरपालिका प्रवक्ता तथा वडा नम्बर–५ का वडाध्यक्ष लक्ष्मी यादवका अनुसार, सो घरका विपक्षी पक्षलाई पटक–पटक लिखित तथा मौखिक रुपमा जानकारी गराइएको थियो। तर पनि अटेरी गरी विकासमा अवरोध पुर्याइएकाले अन्ततः कानुनी प्रक्रियाबाट काम अगाडि बढाइएको हो। यादवले भने, “अदालतमा पुगेको मुद्दामा विपक्षी पक्ष असफल भएपछि नगरवासीहरू खुशी भएका छन्।”
यसअघि विवादित घर भत्काउन पुगेका जेसिबी चालकसमेत घाइते भएका थिए। तर अन्ततः विकास पक्षको विजय भएको भन्दै प्रवक्ता यादवले अडिग मेयरको प्रशंसा पनि गरे।
घटनाले पचरौतामा निकै चर्चा पाएको छ भने पूर्व मेयर पदका उम्मेदवार किशोरी यादवको पनि यस विषयमा चासो रहँदै आएको बताइएको छ। उनी केही महिना अघिसम्म घर नपरेको भन्दै प्रतिकार गर्ने चेतावनी दिने गर्थे।स्थानीयवासीहरू अब विकासले गति लिनेमा आशावादी देखिन्छन्।
