रौतहट ०५ जेठ ।
जिल्ला प्रशासन कार्यालय रौतहटले सेवा प्रवाहलाई प्रभावकारी, सुव्यवस्थित र पारदर्शी बनाउन विद्युतीय टोकन प्रणाली लागू गरेको छ। गौरस्थित कार्यालय परिसरमा सोमबारदेखि उक्त प्रणाली सञ्चालनमा भएको छ ।
सेवाग्राहीको सुविधालाई मध्यनजर गर्दै नागरिकता, प्रतिलिपि नागरिकता, राहदानी तथा राष्ट्रिय परिचयपत्र सेवामा टोकन प्रणाली लागू गरिएको हो। प्रशासकीय अधिकृत किरणनिधि तिवारीका अनुसार विद्युतीय टोकन प्रणालीले सेवाग्राहीहरूलाई लामो समयसम्म प्रतिक्षा गर्नुपर्ने झन्झटबाट मुक्त गर्नेछ र सेवा प्रक्रिया थप सरल तथा व्यवस्थित हुनेछ।
सोमबार एक कार्यक्रमका बीच प्रमुख जिल्ला अधिकारी विनोद कुमार खड्काले सेवाग्राहीलाई टोकन प्राप्त गर्ने तरिका सिकाउँदै प्रणालीको औपचारिक सुरुआत गरे। उनले भने, यस प्रणालीले कार्यालयको सेवा प्रवाहमा पारदर्शिता ल्याउनुका साथै नागरिकलाई सजिलै सेवा प्राप्त गर्न मद्दत पुग्नेछ।”
सेवाग्राहीहरूले पनि टोकन प्रणालीको स्वागत गर्दै यो प्रविधिले भीड नियन्त्रण, समयको बचत र सेवा प्रक्रियामा स्पष्टता ल्याउने विश्वास व्यक्त गरेका छन्।
जिल्ला प्रशासन कार्यालयले आगामी दिनमा अन्य सेवा क्षेत्रहरूमा पनि प्रविधिको प्रयोग गर्दै थप सुविधा विस्तार गर्ने योजना बनाएको जनाएको छ।
