रौतहट १९ जेठ ।
रौतहटको गरुडा नगरपालिका वडा नम्बर ६ अन्तर्गत पोठियाहीमा निर्माण हुन लागेको दुई कोठे वडा कार्यालय भवनको शिलान्यास नगर प्रमुख कन्थमणी प्रसाद जयसवालले गरेका छन्। करिब २० लाख रुपैयाँको लागतमा निर्माण गरिने उक्त भवन स्थानीय तहको सेवा प्रवाहलाई अझ प्रभावकारी बनाउन लक्षित गरिएको छ।
शिलान्यास कार्यक्रममा मेयर जयसवालले भवन निर्माणपछि स्थानीय बासिन्दाहरूले टोलमै प्रशासनिक सेवा सहज रूपमा प्राप्त गर्न सक्ने बताए। अब सेवा लिन नगर मुख्यालय धाउनुपर्ने अवस्था हट्नेछ,” उनले भने यो कार्यालयले जनतालाई अझ सहज र छरितो सेवा प्रदान गर्नेछ।
स्थानीय तहमा सेवा पुर्याउने पहुँच विस्तार र जनमैत्री शासन प्रणाली स्थापनाको दिशामा यो कदम महत्वपूर्ण हुने बताइएको छ। वडा कार्यालय भवन निर्माण कार्य छिट्टै सुरु गरी तोकिएको समयसीमाभित्र सम्पन्न गरिने योजना रहेको जनाइएको छ।
स्थानीय बासिन्दाहरूले समेत भवन निर्माणले विकास र सेवा प्रवाहमा सकारात्मक प्रभाव पार्ने अपेक्षा व्यक्त गरेका छन्।
