रौतहट २१ जेठ ।
फतुवा बिजयपुर नगरपालिका वडा न ११ स्थित हिमालीवासमा निर्माणधीन स्वास्थ्य चौकीको स्थल अनुगमन तथा निरीक्षण गरिएको छ। प्रमुख प्रशासकीय अधिकृत भरत प्रसाद यादव, इन्जिनियर धर्मेन्द्र यादव, समाजसेवी अच्युत मैनाली, टेङ्ग्राहा माध्यमिक विद्यालयका प्रधानाध्यापक अनिलकुमार यादव तथा मोहम्मद फिरोज आलम सहितको टोलीले निर्माण स्थलमा पुगेर कार्यको प्रगति बारे जानकारी लिएका हुन्।
अनुगमन टोलीले निर्माणको गुणस्तर, भौतिक प्रगति र समयानुकूलता जाँच गर्दै आवश्यक निर्देशनहरू पनि दिएका थिए। स्वास्थ्य सेवाको पहुँच बिस्तार गर्ने उद्देश्यले निर्माण भइरहेको उक्त चौकीले आगामी दिनमा स्थानीय बासिन्दालाई आधारभूत स्वास्थ्य सेवा प्रदान गर्ने अपेक्षा गरिएको छ।
\
निरीक्षण क्रममा प्रमुख प्रशासकीय अधिकृत यादवले परियोजनाको कार्यदक्षता र पारदर्शितामा जोड दिनु पर्नेमा जोड दिएका थिए। स्थानीयस्तरमा नागरिक सुविधाको पहुँच बिस्तारमा स्वास्थ्य चौकीले महत्वपूर्ण भूमिका खेल्ने भन्दै उनले निर्माण कार्य शीघ्र सम्पन्न गरिनु पर्ने बताए।
